يا غزة قلبى انكسر

ما كانتش راحة ولكن كبوة لحصان عجوز مكتوب علية يموت محصور ، يجر كارو فيها العجل مكسور ، على ارض رملة متصحرة يعنى الاراضى بور ، يعنى اخر زمره طيط ، قلت اراجع نفسى تانى ، راح طلعلى عمى منتظر ، من الفرحة رحت كاتب بالعامية ورحت ناشر يومين وكتبت ونشرت بالفصحى ، وبدات اكتب بالفصحى عن منتظر الثالثه لكن كانت الردود ترى ان الامر خد حقه ، رحت واقف وقلت رى يح يا واد ، وقلت ارجع تاتا ، رحت كاتب تاتا خطى العتبه وقلت ارجع بيها يوم الثلاثاء ، وقلت ازور صديق لقيت ماما امولة فاكره انتصار بور سعيد ، الله اكبر انتصار رحت كاتب لابى العربى مقطعين عشرة ابيات اذا اعتبرنا ان ما اكتبه شعر ، وانا باكتب المقطع الثالث فتحت التليفزيون لاشاهد هدية الصهاينة فى عيد ميلاد المسيح للغرب فى يوم سبتهم ، تورتة من لحم عربى مسلم ملوش ثمن عند اهله ، مع موسيقى صوتية بشرية تجسد اكبر فجيعة فى عدد الضحايا واذل انكسار
رحت كاتب

رجال كتير عندنا كلهم يلزم لهم يلبسوا بيشة
كتير ، منهم ابو ريالة الطرى ينفع يدوب طيشة
لبنى لما قالت وقف مدلدل يشبه يدوب خيشة
قال الطرى بشرط لوتضربي تبقى حماس
***
يا غزة قلبى انكسر وانجرح باللى جرى بيـك
ومنين نجيبلك ولد صاحى عند الندى يلبيــك
يخاف عليك مالهوى عاشق وف قلبه يخبيك
وانتى بتملى وحدته والقلب والاحساس
***
السـلطة ليه متوزعة ومقطعة بين الغبا والطيش
سبتو الولايا ف العرى مافى غطا ولو من خيش
مات الضنى م التقى مية حتى ولا رغيف العيش
ولا فيش شهامة للعرب واتوحدو الانجاس
***
لو فيكو راجل ذكى مرة يصفح لو خله بيتغابه
د الضفة وغزة من فعلكم صارت يا همج غابه
يكفى بقى الجعجعة جوة الخطب والنعرة كدابة
وتقضو ليلكم عربدة والسكر ويا الكاس
***
لما دا خـاين ودا خــــاين مين يكون الامين فيكم
ياطغمة فاسدة فوقو بقى دالعدو بايدكم بيصفيكم
واللى ح يبقى منكم شرزمة في الغربة ح ينفيكم
والمجد ويا الكرامة تحت الرجول تنداس
***
يا امة فيك الارامل من غيرعدد اغلب عيالك يتامة
داحنا النسور طول عمرنا صبحنــا ناحاكى النعامة
رفاقة ف السلاح وخوات بيتقاتلو لحد يوم القيامة
وطال ب غزة الحصار والعار ولمين تكون الملامة
وظهر الكرامة انحنى وايد الوضيع تنباس

اعتذار

ارجو من الجميع قبول اعتذارى عن التوقف لفترة اجدد فيها نشاطى ، وللجميع على السواء الشكر منى والثناء ، وكل عام وجميع البلاد العربية والاسلامية فى امن وامان بمناسبة العامين الهجرى والميلادى
والسلام عليكم ورحمة الله وبركاته

الزيدى

على غير عادتى فى النشر كل ثلاثاء ، وحبا وكرامة لمن اعاد بفعله الشجاع بعض الكرامة ، انشر على التوالى قصيدة وهى بالفصحى على غير العادة بعد قصيدة اول امس العامية ، ومن يرى انها تستحق النشر فلينشرها ، وامنيتى ان يسمعها هذا العملاق واهله وكل الناس ليعلموا اننا عرب يؤلمنا ما يوجعهم ونشاركهم الاحزان والافراح

حذاء طال واستطال على السيوف واطول من رمح عنتر
فذاك فك من الاسر عبلة وهذا اذل ذليلا طغى فينا وتجبر
طعنة نجلاء انحنى لها هلعا . تصاغر فحذاء الزيدى اكبر
صنيع القرود عدو لدود غبى كريـه الطبـع والوجه اشقر
صنيع العار لعنت مادمت حـيا وجزاؤك فى الشرع تنحر
فنلت والاقذام عار ومجـدا لـنا بالزيدى فى الافاق ازهـر
وما عاد للـخوف فينا طــريق وما عاد فى العزيمة ينخر
قالوا سنيا وقالــوا تشيـع ومن الخوارج قالوا هذا واكثر
قالوا لينالوا منك فخابـوا انت الابى جميل الوجه اسمـر
انت فالاصلاب تحدرت حـرا والحر على الطغيان اظهــر
ابن الفوارس وقلب حديد ما خـفت غدر ولا آلة عسكـر
انت الصديق وانت الشقيق وانـت سيف للكرامة مشهر
فيا امولة اذكرية بخـير انـة على الدهر بالفضل اشهـر
والمدونون بصنعه اشادوا والــزيدى فى الشجعان اندر

صياد رؤس

انى اعتذر لكل من وعدتة بالكتابة عن غزة ، وقد فعلت وانتهيت من مراجعتها نحو الثامنة من مساء اليوم الاثنين 15 – 12 – 08 ، غير ان واقعة ضرب بوش بالجزمة دفعتنى الى كتابة ما كتبت ، ومن يرى ان ماكتبته يستحق فيتكرم بنشره فى مدونته تكريما لمنتظر الزيدى


صياد رؤس بالجزم بس مداها بــعيد
تسلم يا بطل همتك تسلم كمان الايــد
كسرت خوفنا ودى اجمـل هدايا العيد
ياما كادونا وانت كمان بالجزم بتكيد
انين ذلنا يا منتظر بدلـــته بقى تغريد
اسمع معايا الطرب ف لحد كل شهيد
وآدى الاله حببك للاهل والخلان
***
كتبت يا منتظر ملحمة وبس بالجزمــة
فيها كل اقزامنا اتباع الغرب فى ازمة
نفوس ضعيفة خايرة خايفة ومنهزمة
كل امة تصنع مجدها لو تكون عازمة
فيها قيادة امينة وكمان تكون حازمة
يسود امان والحرس م يبقلوش لازمة
وكل مصرى بقى فى ارضنا انسان

(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصري

غزة انت

كى لانخلف وعدا ، ومع مرضى كتبت ، وظهر العروبة مطعون ، فلم استطعم الصمت ، وسوف اسجلها بصوتى الى من تصعب علية العامية


غزة انت كنت باب النصر لينا فى عين جالوت
بالفساد انهزمنا سيبنا فيك كل خلق الله تموت
بانكسارنا وذل عارنا اتكتمنا التزمنا بالسكوت
دول شبابك همه دول اللى اسود
همه دول الصورة حية للجدود
لو بنسجد للخلايق ليك نبقى فى سجود
***
اللى قضى الليل حـداكى فى ضلامه اوسهادو
ايه يفيده من جيرانه مهما قالو ومهما عادو
لو قلوبهم تصفى حبة كانو ساعدو لو ارادو
دالصهاينة بيدخلولنا بالبطاقة
واهل غزة يقفلولهم اي طاقة
يعنى نقفل اى منفذ ع الحدود
***
اهل غزه دول شقايق فوق داكله همه جــيرة
ليه وعودنا دى اونطة والزعامة شكل عيرة
لما جالنـا امر طاغى يمنعونا م المسيرة
سيبنا غزة فى حصارها والكفاح
عزم ماضى كف فاضى م السلاح
بس غزة دى نموذج للبطولة والصمود
***
كل قائد فى بلادنا هوه فاهم ان ما فالــدنيا غيره
والمعارك اللى دايرة يعلى فوقها صوت شخيره
يقضى طول الليل يمزمز والجوارى فى سريرة
يعلا كعبه جووا شعبه من حصــاره بيستجيرو
واللى يهرب م الحصار راح هيرجع
راح هيضرب ضرب جامد حتى يركع
فى الوعيد الله ينور بس خيبة فى الوعود
***
غزة انت كنت باب النصر لينا فى عين جالوت
غزة عايشة فى قلوبنا غزة قطعا لن تموت

(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصري

قراءة اشعاري: اهل غزة

قراءة اشعاري: انا بيرم المصري

مين يقوللى

الصهاينة يجيدون استخدام سياسة النزناز تجاه سياسة التراخى العريية المعتمدة على ركائز ثلاث – المسامح كريم – واللى فات مات – واللى يى جى عالولاية ما يكسبشى ، ويضربون الحصار على شعوبهم الداجنة ، ويسيبوهم يكاكو ، ولا من شاف ولا من درى

مين يقوللى

يا نظام ناسى ربه ذل شعبه راح يفـرط فى مصيره
مين يقوللى الاله اللى خلقنــا فـيـه اله تـانى غـيره
انتو بس اللى التزمتم بميثاقه واتبـعتم خــط سيره
واحنـــا ضعنا لجــل يرضى ضاع وطنــا وكل خيره

***
والصهاينه جنس عاصى قلب قاسى نفس شــاذه
شربوا دم الخلق خمرة والرضيع من لحـمه مـزة
دول وحوش وف ضراوة راحوا يفنوا اهـل غـزة
التيوس اللى حدانا استخبو ما فى حد حتى عـزى
دول بيحاجو عالكراسى راح تطيح وبـ،اى هـــزة
***
راح جمالنا قبل فيصل والكريــم اللى اسمه زايـد
همه دول اللى رجالنا فوق نضــالهم مين يزايــد
واللى باقى دول هوانم فى طباعهم ضــعف زايد
اللى بات يحلم بليلى غبره بات ف حــضن عزة
فى اوربا نسيو دينهم قاموا شـــافوا الـدنيا لـذة
***
الحصــار اللى فى غزة طال وعـمـره من سنين
قالو نــعبر جا المسهوك قال هيكـسر رجل مين
تك نــصيبة دانته تافه واللى زيـك شـــالو طين
دالحمار لو كان مكانك كان هيغضب كــان تاذى
كن نصيرهم يا الهى واحمى اهلى اهل غزة

(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصري



ش

اغربى

انى اعانى مرارة من ظلم ولهو وعبث وغد مخبف ، وهل نضب النظام الحاكم فعلا من رجل رشيد يخاف الله فينا وفى امته ، وهل حرصهم على المناصب اظلم عقولهم وامات ضمائرهم ، وهل نحن شعب قاصر فرضت عليه وصاية نظام غير راشد ، ماعدت ادري
هذه قصيدة بالفصحى ارجو ان تحظى بالقبول عندكم ، وما اقدمت على هذا اللون من الشعر الا تلبية لرغبة بعض الاصدقاء وكسرا للملل

اغربى

اغربى فانى الان غاضب
ولا تعتبي فلن اعاتب
انى صادق وما كنت ابتغى لهوا
انا الثابت فى الارض جذرى
وما جئت اليك سهوا
انا المفرّد فى عقر دارى
وانت دارى
فكونى كما اهوى
انا الحقيقة فى ضحاها
ما كنت وهما فالوهم كاذب
ساضرب بطول باعى
من الجنوب الى الشمال
وفي الاغوار
والانهار
وفي السهول والتلال
واصنع من مفردات الخيال
واقعا يمحو المحال
فاجمعى بين ذراعيك راسى
كى استكين
واهمس اليك عفوا سامحينى
فاصفحى لا تعتبي
ولن اعاتب
وما عدت بعد الان غاضب

(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصري

كلام الليل

تإعتذار
اني اعتذر لجميع الاصدقاء لتأخري في الرد علي مشاركتهم وذلك لأمر خارج عن ارادتي وهو السفر الي قريتي فجأة وإصابتي بالانفلونزا مما منعني علي الرد وأشكر الاخت الفاضلة ماما اموله وأخي المجنون وابنتي عفراء والاخت mahasen saber وحبيبي الازهري والدكتور صاحب الكحيان والاخت Soul.o0o.Whisper والاخ على عبدالله والاخت mony والاخ ابن الناس الطيبين والاخ mohamed ghalia وأخي المفكر والاخت rovy والاخت M.K والاخ فركشاوي ناوي والاخت بس خلاص والاخ محمد الجرايحي والاخ sesame والاخت بسنت والاخ محمد ابو الفتوح والاخ صاحب مدونة واحد من العمال والاخ صاحب مدونة قلب مصري , وكلي امل ان يقبل اعتذاري ، وهذة القصيدة كان موعدها الثلاثاء الماضي وارجو ان تنال اعجابكم

كلام الليل

كلام الليل دا كدبه مدهون بذبدة يطلع عليه النهار يسيـح
مـسرح عرايس وكله هايص ناس بتهتف وناس تصيح
كلام معاد من عهد عاد خدعة وقديمة مهوش صحيــــح
والعيشه عيضه يانفوس مريضة كله يهنكر والعقل ميح
انا فى كربة عايش فى تربة يارتنى عايش فبيت صفيح
وكل تافه بقت له قيمة ** ابن اللئيم وابن اللئيمة
وده النصاب وده هتّيك
وده صابغ ومتلمع جوه البدلة متقمع بيتـمايل ويتـــــعايق
ودى منحة بكام كرسى ياسى مرسى ونسوانا حتتـــخانق
وده قاله مفيش غيرك ودا خيرك ورح حالف يمين طالق
ولو انسان يقول غلطان تلاقى الكل فى دبحه بيتسـاــبق
وده قاعد ومدّارى وده الغافـل ومش دارى ومش فـارق
وانا المرعوب ومتهدد ** وده الشبعان ومتبغدد
وده الاوحد ومالوشريك
ودحكومة صحيح نايمة لكن دايمة ومسنودة باهل الزور
وداخلبوص ومتجرم وداعاشق بنات عجرم ودامخمــور
ودة البج بوص زى البرص وله ماضى مهوش مستور
ودى الوكسة فى كام جلسة صبى يديرها وكام طرطــور
ولو قولى ميعجبش اقول حابس يااسيادنا واقول دستور
والكل يجرى من اى كشة ومصرتبقى فراخ وعشة
واحنا البرابر وهوه ديك

(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصري

الف نيلة

حرصا منى على الاصدقاء المدونين ، وحبا فى استمرار التواصل ، احببت ان اغير هذه المرة من لون العمل المنشور لكسر الملل مع الحفاظ على الهوية والطابع العام ، والهدف اللذى هو ايقاظ الهمم ، وكلى امل ان اكون قد اصبت والا ، فانى اعتذر

من حكايات الف نيلة ونيلة

النيلة الاولى

كان ياما كان فى زمن القهر والهوان
فى كل ليلة يعقد مجلس السلطان
وهو مجلس مخصوص
للمقربين من البطانة ، وعتاة اللصوص
وهم حبة من الكلابة
وحبة من ديابة
وحبة تشبه فى طبعها الخرفان
الكل يصمت فى ترقب وانتظار
ظهور مليكهم - البرم كار -
ولما لاحت طلعته من بعيد
بين الجنود والحرس والعبيد
وهو يمشى فى خطوه الوائيد
لانه يرتدى قميصه الحديد
وجلس - البرم كار -،
كالعادة فى وسط الدار ،
ثم استدار ،
الى اليمين مرة ومرة الى اليسار،
وفى بلادة ،
كطبيعة فيه وعادة ،
باصبعه التخين اشار ،
فاقبلت عجوز كركوبة ،
تقطر خبثا وذمتها مخروبة
فى بطانة من ذوات الشلت اشباه الزكائب
اوكالبهائم يعلفن فى وسط الزرايب
وهى تمشى فى دهاء ،
تتعثر من الشيخوخة والاعياء ،
فاوما لها البرم كار ،
وغضب وثار
وقال عار عليك ان ترتدى لباس الجاهلية واى عار
انزعى عنك هذا الخمار ،
فنزعته دون تردد ،
وقالت فى خبث وتودد ،
انت حقا داهية ،
فلا تجعل غير الغوانى والفجار فى الحاشية ،
وتخرس القيل والقال ،
وتحوج الامة الى ذل السؤال ،
فيستقيم لك الحال
ولنسلك على التوال ،
ومن يعاند يلقى فى الهاوية ،
وتسوق الباقى من الامة سوق الماشية ،
فضحك وشفتر ،
ونهق وخنفر ،
وقال سكر والله سكر ،
واقبل عليها كالمعتاد ،
وقال طالبين رضى الاسياد ،
من اهل ثمود وقوم عاد ،
وقد عملنا بالوصيه ،
وجعلنا فى البطانة ابوريالة الهفية ،
حاجة ناعمه مزفلطة ملهاش هوية ،
ده وعدى للاجانب والوعد عندى دين
قالت لازم تقولى الخلقة دى لقيتها فين
وحق البيت البعيد ده ينفع على الوشين
قال - البرم كار - ما هوده المسهوك مريض وطبعه شين
وراية فى اسرى ماتوا بالدم البارد ،
ان الامر ده عادى وشئ وارد ،
وعيبة نطلب عوض ونخسر الجيرة ،
وواجب علينا نختشى ونفضها سيرة ،
وراح - البرم كار- كانه بيبرطم ،
وحروف كلامه فى بقه تتقرطم ،
فقالت له نام والبيت البعيد حارس ،
ده انته الوحيد فى البلد وانت الوحيد فارس ،
نام وشد فوقك تلتميت الحاف ،
وهمه يحمدوا ربهم لو لقيوا الرغيف الحاف ،
ده عمرك ماخفت منهم ،
ولا من ربهم بتخاف
واطبق الظلام
فهجع فؤاد -البرم كار- ونام

(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصري

جلا جلا

جلا جلا كلمة تلاك فى افواه الحواة ونافخي النار ، ذلك فى الموالد وشى الله يا صاحب المقام ، ويقف الناس امامهم وقد شل فكرهم ، فيدفعون ملاليمهم عن طيب خاطر لمن خدعهم وغبب وعيهم

جلا جله

جلا جله ماهو ارخى ليلى كلكله
شوية منه هلفطه * وشوية منى لخبطه
وحبه ذل وبهدله
جلا جله
حاوى وشغله عالدماغ
وذلنا تعرفش ليه * ماخلى قيمة للجنيه
خلاه ميسوى قرش صاغ
وخلى فوقنا اسفلة
جلا جله
ياشعب فوق الفتة عام
النهب فينا منتهاش * الالف منا بالبلاش
والسعريرخص كل عام
وعرفنا ذل المسالة
جلا جله
تصلح فحالك مستحيل
تحب وضعك فالثبات * متبكى عمرك عالفات
وخم نوم والنوم تقيل
ولاتصحى حتى بزلزله
جلا جله
ياريت شبابنا يوم يفوق
يحط رجله عالطريق * ويبقى حر يعيش طليق
تموت افاعي فالشقوق
وينسي طبع الهرجلة
نلقاه بحلمه وقد علا
جلا جله * حلا حلا

(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصري

لسانى كرباج

كان الشرفاء واولاد الاصول فى الزمان قبل الحاضر ، يخافون العيبة ويتجنبون ما يشين من الافعال ، وينفقون الاموال حفاظا على سمعتهم وصونا لكرامتهم وتطهيرا لشرفهم ، على العكس من ابناء الهمل والرعاع والبلطجية ، فهؤلاء دابهم جمع المال بشتى السبل ، فلا ضمير يردع ولا شرف ولا كرامة ، ويحتمون بالبلادة واللامبالاة ويعطون الطرشة لكل من هجى او عابهم ، ما دامت ردود الافعال لا تتجاوز حدود الكلام

لساني كرباج سوداني

لساني لسـاني د كربـاج ســوداني
وكل اللي اللبـه حيفــــضل يعـــاني
فلا طب يشــفي ولا حـــاجه تـاني
ولا الســــحر ينفع وزيه العطارة
***
بيفضح وينشــر وساخة الغسيل
ويمسح كرامتك يا اكبرعويـــل
بتـــاكل وتشــرب ولكـن قتيــــل
فعالك زميمة وسعيك خســـارة
***
تقـامر بقوتي فلعبة سيـاســـة
وتسعي لموتي وكلك حماســة
ياويلك ياعارك يا كتلة نجاسة
فلا توبة تنفع ولا لك طهــارة
***
هتفني وترحل ويفضل هجــاك
ويوم القيامة هتفـــــقد رجــاك
وشرك يجيلك ومين غيره جاك

وتدخل جهنم فحزمـــة حجــارة

(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصري

مدد يا صاحب المقام

عوج الحديد البارد ما يعدلوش الا الطرق الشديد
بيرم المصرى

فى الاصل انا فلاح بحراوى من الشرقية ، كانت لعبتى واقرانى من الاطفال ركوب الخيل ، والحصان طبعا عود حطب ناشف او قطعة من جريد النخل ، وفى المساء كل مع جدته او امه ينام على حدوتة الشاطر حسن والاميرة التى خطفها الغول ومزق هدومها ، وفى احلامنا الرقيقة كفقاقيع الصابون ننقذ الاميرة ، ولم يرض احد عن ضرب الغول ضربة واحدة ، دحنا نفسنا نجلدة ونكسر عضمة ونعلقه من ودانه ، كبرنا وكبر حلمنا وكانت الاميرة هى الوطن

مدد يا صاحب المقام

مدد مدد يا صاحب المقام الرفيع نظرة ومـــدد
جبناك عشان نعلى مجدنا واتاريك مقاول هــدد
ويٌاك رجعنا لورا وبين البشر بقينا كمالة عــدد
***
املنا الوردى فى توشكا وفيها كــان مـــزروع
قالو خيرها كان يكفٌينا ينسٌينا سنين الجـــوع
اتارى الحلم كان كدبة وفيه الكل كان مخـدوع
ورملتها شربت الميٌة وشربنا حــــسرة ونكد
***
سٌرحو العمال بالهبل عشان باعو مصانــعنا
كدة من غير سبب نعرفه ولا قالو ليه بـــعنا
لا مصنع بقى لينا وحتى للارض ما رجـــعنا
وبنعانى الفقر والغربة واحنا صحاب البـــلد
***
الجيش عندنا بانواعه والشرطة بانواعــها
وفيه قوٌةغشم خاصٌة بالبلطجة وصنٌٌاعــها
بتنزل عند اللزوم تخريب ولا حـد يمنعـــها
قتلى كلهم مننا واللى اندهس واللى انجــلد
***
فالزفةعرايس ورق عصبة من الالاضيش
وعتاوله فى الاجرام تجار سخام وحشيش
واحنا كمان بالهطل صبحين نكون دراويش

نذكر وننشد يا صاحب المقام نظرة ومدد

(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصرى

عيد النصر فاكتوبر

عفوا واسمحوا لى فى هذه الكلمة قبل تقديم قصيدتى اوالعمل الادبى الاسبوعى فى كل ثلاثاء ، وهى ان الاخ الكريم الدكتور توكل مسعود صاحب مدونة
( http://belawa6an.blogspot.com/ )
عرض فى مقال ادبى رائع ، قوامه الاعتماد على الاحاديث والتاريخ الاسلامى ، ومبعثة طهارة قلبه وغيرته على اخوانه ، وحبه لهم فى الله ، وبحبه للخير عرض تغير اسم مدونتى باسم اخر مناسب غير ( المدهول ) وكلى امل ان يشاركه جميع الاخوان بالموافقة اوحتى بالرفض ونمارس جميعا هذه التجربة

عيد النصر فاكتوبر

عالحصيرة ابويه قعد سند ضهره على التــــوتة
صوته العريض تخنقه دمعة لمـــا يحكى حدوتة
دي فاتت عليها سنين يحكى مــا ينسى فتفوتــة
***
قال ودمعة تلمع وكنه فى جوف الزمان هايـــم
لما التقيت اخويا ميلاد في دمة الشريف عايـــم
قلت له مية قال خليها عشـان انت يخوى صايم
سلم روحه فى حضنى وكان زى الملاك نايـــم
وبوست ايدة وراسه دا مين غير الالاه دايــــم
***
لجل دمه ما يروح هدربقى طولى بطول مـارد
لقيت روحه وروحى اتنين وبس البدن واحــد
هيه دى مصرنا عند العسرتلقى عزمها جـامد
***
وصبر شعبها يعلى فوق صبر النبى ايـــــوب
عمره مخارت همته ولا عزمه كلن معطــوب
بالقصر يرضى ويسكن وحتى لو بيت طــوب
والحكمه ان الكفن عمــــره ما كان لو جيوب
قال ابويا الله يرحمه وصوته فالحنـان بيدوب
***
رجعت انا ارضى يا بنى ماللى خدوهــــا زور
وزارعها جناين خضره واياك تسيبها اتبــور
ايدك فايد الجار نبقو فوشوش الديابه ســـور
داعمره مايعلى طيرلو عنده الجناح مكســور
***
فى اليوم ده عيدنا كلنا وعيد النصر فاكـتوبر
عيدى وعـيدك سوى ودالعيد اللى كان سوبر


(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصري

طوابير ورا طوابير

مع بشائر عيد الفطر السعيد اعاده الله على مصر وشعبها
وكل عام وانتم فى سعادة وسرور

طوابير ورا طوابير

طوابير ورا طوابير يا مصرنا طوابيرطراطير
زرعو النواحى شوك طرحت ارضنا مسامير
وحطونا على جمرهم وف ايد الحكومة كير
لجل ما يفرحو القرد والخنزير
كمان يرقصو طوابير مع طوابير
***
الشرطة حارس خصوصى يسند معاها الجيش
وبكرة السفيه يعمل لنا من تبن البهايم عيش
والقطن ما نزرعوش عندتا ويلبسونا الخيش
اياك فمرة تتهبل او تتهطل وتسال فمرة ليش
راح تتعبط راح تتربط بالقفل والجنزير
وتلقى نفسك جنبنا طوابيرورا طوابير
***
مصر ياسمرتى ويا حلوة وطولك بطول النهر
صبرت ليه يا ستنا عالهوان والذل ويا القهر
تقلت حمولك وانهد حيلك هدو كمان الصهر
نشف ريقى وناشف حدانا الزير
صف العطاشى كبربقى طوابير
***
قالو ازرع امل قلت انا موافق على عرضكم
بس ازرعوا القطن تانى والقمح فى ارضكم
خلو كمان شغلنا عبادة وفرض ويا فرضكم
متقفلوش فيوم جامع متقفلوش الدير
ندخل ونعبد ربنا طوابير ورا طوابير
***
ومسلم وجنبه المسيحى نزرع ونحصد خير
ويرجع امان ارضنا وتآمن فى سماها الطير
نشبك ايدينا بمحبة وبعزمنا حبة حبة نسير
للسعد نمشى كلنا طوابير ورا طوابير
طوابير ورا طوابير

(لا تنسوا النقد والتعليق فانى اقوم به قلمى )
فى كل ثلاثاء جديد
بيرم المصري

انشق بطن الامل

إنشـــق بطـــن الأمل بحـــد سـيـف الــــزور
وإنحـــل عقـــد الخجل واتبعـــتر المســتـور
مصر الكحيلة عمرها صبحت عينيها عـــور
وبــدد جمـــال وشــها كــتر الفساد والجــور
خسفـوا شـموس عـزنا غطى الضلام عالنور
مالت ع الكبير تتســند طلـع العمـود مكسور
قــالت ولادى دراعى اتـارى زنـدها مبتــور
يامصــر جتلك عصابـــة نطت علينا السـور
جابوا حجات متسرطنة خلوا الأراضى بـور
باعـوا للأعادى الفضا فتحوا طرق وجسور
وحايخصخصوا لينــا الدوا والمية بعد النور
وبكـره حيجيـلك ولـد حيخصخص الدستـور
تلقى كلامــــه بغبغـــة وبدال الشنب بربـور

(لا تنسوا النقد والتعليق فانى اقوم به قلمى )
فى كل ثلاثاء جديد

حادى بادى

الشعب المصرى من بين الشعوب المقهورة اللتى تخلق البدائل لواقعها المر وتصنع منه وهما نعيشه ، ومن ابرز الامور ان الشعب المصرى لم يمارس حق الاختيا ر فى حقب طويلة ، ولكن من الغريب انه لما صنع لعبة الاختيار وهى ( حادى بادى ) لم يمارس حقه فى الاختيار بل جعل ( سيدى محمد البغدادى ) ينوب عنه فى اختيار بؤجة الادارة من الوزير الى الخفير ، وبؤجة الادارة محكمة الربط ، ويصعب اختراقها ، وبداخلها يتم الترابط والتشابك ، وتزداد العزلة عن الخارج ، ويظل سيدى محمد الوحيد صاحب حق الاختيار فى لعبة ( حادى بادى )
حـــادى بــــــادى

حـــادى بــــــادى ســـــــــيدى محمــــــــــــد البغـــــــدادى
ياللـــــى تهنـــــكر قـــرب منى والمتوضى يبعــد غــــادى
راح نقـرألك شيئ مالطـالع واللى نقولـه شيئ مش عادى
ياللى حتنصح ريح نفســـــك من راح يســمع مهما تنادى
حادى بادى قوم ياحبيبى غير كارك
*****
حــــــــادى بــــــــــادى ســـــيدى محمــــد الفـنـكـــــوش
سلطــــــــة زبــــــــادى صحــــن بصارة وفول مدشـوش
تضرب تقلب من راح يغلب فـوق الكرسى فيه طربــوش
تلك آمــــانى الداعــر عـزرا تلك وصايــا الصـايع بوش
حادى بادى قوم يا أفندى واستر عارك
*****
حــــــادى بـــــــادى ان البــــــادى هـــــوه الاظــــــــــــــلم
كل مرشح حـــــــزب الحـــــاكم يوم ترشيحه راح يتفـــطم
سيـــبو الشـــعب لوحده يهــاتى لو حيهاتى او حيبــرطــم
واللـــى حيــجى لو تسألنى يبقى الافــــضل منــه حبظــلم
فال الحادى هوه حيجى واشرب نارك
*****
حــــــــــادى بـــــــادى خدهـا نشيدك خدهــا شعـــــــارك
ليـــلك أســــــــــود وأســـــــــود منــــه هيبقــى نهــارك
لو حتفكـــر تعمـــل راجــل أو حتفكــر تنصــف جــــارك
اســـمع منى وخدها نصيحة قوم وادارى جوه فى دارك
حـــادى بــادى واحسن حاجة تربى صغارك

الشعب فى مصرنا

الغباء كاى سلوك ، فطرى ومكتسب ، والفطرى هو القصور الشديد فى ذاكرة التاريخ ، بمعنى اللى فات مات ، وهو فى المصريين ابين واسموه طيبة ، والمكتسب محصلة القهر والبطش لسلطان مغيب ، ومسالمة مثل هذه السلطة عادة مصرية ، وهكذا صار المصريون طيبون مسالمون ، اى اغبياء بالفطرة والاكتساب
الشعب فى مصرنا
الشــعب فى مصرنـا اهبــــــــل عبيط سكة
فى الرغى يلا الســــــــلامة يحكى ويتحكا
واى حاجة اتلخبطه ولا يعرفـــــوش سكة
القلة مــنه بيفـهموا بس ما تنفـــــع الفكة
غرقنا قال فالخصحصة ومعـــكوكين عكة
وحزبنا الحــــاكم ملـهمه ساكن ديار عكة
زانق رقابنا فى الرغـــيف يضغط ويتكى
قلوبنــا ماليها المـــرار ومدكــوكين دكة
وعشان نثور يلزم لنا يجى ستميت حكة

,وجهة نظر

المدونات من وجهة نظرى صفحات فى جريدة عامة لعرض وجهات النظر فى اسلوب الحياة العامة ،

دون التعرض الى معتقد او جرح للحياء او افساد للذوق العام

وجهة نظر

قامت وزارة التربية والتعليم ـ تطبيقا للسياسة الحكيمة فى الزمن السعيد ـ بتبنى فكر المثل القديم ( يموت المعلم ولا يتعلم ) وحرصت على وضع الضوابط والقيود فى هيئة احتبار مثل (اين كم بعد الموت ) او مثلا ( الى متى يعيش السلطان ) فان وضعت رقما فانت ناوى تقصف عمره ، وان احجمت فانت جاهل وتطمع فى زيادة راتب غير مستحقة لانها ستكون خصما على حساب الحصص الموزعه على السادة بطانة السلطان بحكمة وحسب درجة القرابة ، مع العلم ان الجابى عمل بهلوان لجمع الاموال من افواه الارانب

عالم المدونات

سيدتى سيدى
من البداية عذرا وقبل كل شئ لست ناقدا ولا معلم ـ وانما متذوق واحرص على الانتفاع من هذه التكنولوجيا ـ ما دام الامر متاحا ـ فى النقد مع الاطراء لتقويم الاخطاء والصدق مع النفس ومع الغير ولا داعى لأطراء لا يصلح كأن نقول شعر رقيق وفيه عمق ـ مع ان الامر كله مجرد بضع كلمات وضعت فى سطور تباينت بين الطول والقصر لا قافية لها ، وان وجدت فاعتامدا على صورة الحرف دون الاعتماد على اعرابه من رفع ونصب وجر ، بالاضافة الى عدم مطابقة حركات الحروف قبله بالتوازى ، من ضمة وفتحة وكسرة اوسكون . حفاظا على الجرس الموسيقى للشعر ،واما الصور الشعرية فيجب ان تكون جديدة تخدم المعنى ولو قال قائل ـ اهدت الينا وردة اوراقها فى نعومة الورد ـ فلا شاعرية فى هذا القول التقريرى ، ناهيك عن الاستعارات المغلوطه كما قال احدهم ، ثلج الصيف وعواصف الربيع وامطار الخريف هذا القول لايصلح ان يكون شعرا لانه لايصلح ان نقول ـ فى نعومة الاسد وفى رقة الفيل

ابويا الله يرحمه

أبويــا الله يرحمـــه كان سجـــاد ولــرب العبـاد يركع
ولا ينحنــى إلا فى يــوم الحصـاد ويوم ما كان يزرع
ولما يقيــم عــوده العفى الشــمس فى جبهتـه تسطـع
وعنـد الغروب لمــا حكى ومر الكلام زى الألم يوجع
*****
قال كانت لنـا ترعــة فى البلد بين الخطــوط تجـــرى
أفتح لهــا القوانــى فى أرضنــا وأفتــح كمان صدرى
وأعطر طريقها بالعرق تدفع ذهب من زرعها أجرى
بتيجى من بحــرنا متحمله بالخـير وتصبه فى حجرى
*****
قـلت يابـا أرضنـا ماتت وحتى البحر ماله عندنا عازه
اللقمـة ويا الهـدوم مستـوردة وعبـوا المية فى قزازة
عيشـــة مهينــــة وفى عـــرف السفيـــه نعمة ممتازة
وفى شــرع أهــل البلد سكينة فى رقاب الخلق جزازة
*****
قالى نسيتـــو قـــول الحكيم مهمـا ضاقت بعـدها توسع
والحـــق لو يــوم ضاع بالهمــة القوية لا بد يوم يرجع
وعيشــك اللى ما تخبــزه بايدك أكلـه لا يشفى ولا ينفع
ويغضـــب عليكـــم ربكم والهادى لا يرضى ولا يشفع

عين الشمس

عـــين الشــــمس عيانـــــة ومعصوبــــه بشـــال الليـــل
وفــــــــاس الحـــــزن منكـــودة ومرفوعـــة تهـد الحيـل
هجمـــت علينـــــــا عصابــــة زى الطوفــــان والســـيل
خلــــــــوا شبابنــــــا منكســــــر راضــــى يكـون الذيـل
باعـــــــــوا علينـــــــــا وهمهــم ووفـوا من دمانا الكيل
ولا خلـــوا فى البلـــد فــــارس ولا حتــى حداهــا خيــل

اقوال بيرم المصرى

دى حبة من الاقوال تنفع تكون امثـال
عند اللزوم تتقال
احفـــظها فى قلــــبك احفظها على الجوال


1
قلم التريخ ازميل عمره م كان ريشة
2
عجوزة عايقة ومش دارية تبقى بين النسا خرية
3
كلب الحراسة يهوهو ع الغريب
وكلب الزرايب عندنا دخل علينا الديب
4
صابغ يداري عننا شيبه
ربنا يفضح ع الملا عيبه
5
فعل الكريم زي الحلايا من دهب وفصوص
وفعل الخسيس شين زى الوسخ بيعوص
6
لو غدر الزمان وبين لنا جوره
يعلى علينا عيل منشفشى بربوره
7
لو مالقيت الديابة صيد تاكل الجريح فيها

شوفوا الرغيف

تقوم الحكومات الوطنية فى دول العالم المتقدم والنامى والمتخلف غير المستعمر بدفع مبالغ مالية فى هيئة دعم لمنتجيها بهدف الحفاظ على مستوى الانتاج وجودتة وحتى لا تتحمل شعوبهم الحرة اى زبادة فى اسعار التكلفة ، وفى المحروسة تقوم حكوماتها المستاجرة وبقدرة قادر بعمل عكسى اذ انها عندما تقرردفع دعم لمنتج (كده وكده) ينزل هذا الدعم الوهمى كالصاعقة فيمحق السلعة ومستخدميها ، كما حدث لرغيف العيش الذى عانى فى كل دعم وهمى فاستحال دورانه واختل ميزانه واسود وجهه فراح يضمر ويضمر حتى اوشك على الاختفا ء ، واعلن منجم النار المعدة لحرق الاعصاب انه بعد عدة عقود ستروى العجائز هذه الحدوتة ( كان للمحروسة ارضا يزرعها الناس بنبات اسمه القمح ، وكانوا يستخرجون منه مادة يصنعون منها رغيف العيش ، وهو عماد حياتهم وسر قوتهم وزيادة نسلهم ، وفى غفلة دخل القرد والخنزير تحت غطاء المردة فسرطنوا الاررض وعكروا الماء ، واقاموا حفلة زار الخصخصة للاميرة * رصم بح * ومنحوها حجاب العولمه ليحميها من جريان *حابي * او عودة * جب * للحياة ، وكان الشاطر * كرمباح ) بفكره البصيط اعد خبزا وجعة فرقها كرشوة على حراس قصر المحروسة ، ففتحوا له السراديب ، واوصلوه الى مخدع الاميرة ، فاوصد عليها الباب ، وختمه بالرغيف )

شوفوا الرغيف اتسخط لما بقى مدعوم
جايز كمـان يختفــى واحنا علينا انصوم
كل الخلايق يغرقــوا بس البتــــاع يعوم
وكل واحــد مننــا شايـل همـوم وهموم
أدى شبابنـا منكسر صابح ذليل مهزوم
ولقمة نشـفة عندهم نعمه ياريتها تدوم
بلع لسانه وانخـرس حتى النفس مكتوم
بسمع كلام طلسمة عمره مكان مفهوم
وبكــره ضــايع منهم, فيه الأمل معدوم
أدعــــوا معــايــا ربنـا يا حى يا قيــوم

كل اللى كان السبب يجيى ينام مايقـوم

بيرم المصري

انا مطرب ومن غير صيط وكام اطرش عــداد تختى
وباقضى الليل بطـوله اجعر عشـــان انده على بختى
يجينى فوق حمار اعــرج وكـان نفسى يكون بوختى
ودوختينى يا دنيــا على كعبى وبرضو انت مادوختى
لانا بحــجل مع الغربان ولا بعرج ولا نطاط
ولا هبقى فيوم بومة ولا هبقى فيوم وطواط
وتعرف قولى بمزانه ولو عاوز يكون مطاط
وعندى قول بيتفصل ومتاصل منيش رطـاط
دنا بيرم المصرى منيش كورة فى يوم تنشاط