الثلاثاء، 2 سبتمبر، 2008

ابويا الله يرحمه


أبويــا الله يرحمـــه كان سجـــاد ولــرب العبـاد يركع
ولا ينحنــى إلا فى يــوم الحصـاد ويوم ما كان يزرع
ولما يقيــم عــوده العفى الشــمس فى جبهتـه تسطـع
وعنـد الغروب لمــا حكى ومر الكلام زى الألم يوجع
*****
قال كانت لنـا ترعــة فى البلد بين الخطــوط تجـــرى
أفتح لهــا القوانــى فى أرضنــا وأفتــح كمان صدرى
وأعطر طريقها بالعرق تدفع ذهب من زرعها أجرى
بتيجى من بحــرنا متحمله بالخـير وتصبه فى حجرى
*****
قـلت يابـا أرضنـا ماتت وحتى البحر ماله عندنا عازه
اللقمـة ويا الهـدوم مستـوردة وعبـوا المية فى قزازة
عيشـــة مهينــــة وفى عـــرف السفيـــه نعمة ممتازة
وفى شــرع أهــل البلد سكينة فى رقاب الخلق جزازة
*****
قالى نسيتـــو قـــول الحكيم مهمـا ضاقت بعـدها توسع
والحـــق لو يــوم ضاع بالهمــة القوية لا بد يوم يرجع
وعيشــك اللى ما تخبــزه بايدك أكلـه لا يشفى ولا ينفع
ويغضـــب عليكـــم ربكم والهادى لا يرضى ولا يشفع

هناك 4 تعليقات:

maxbeta3zaman يقول...

دى قصيده جميله يابيرم ..فى كلماتها البسيطه معانى عميقه ..أعجبتنى القصيده
تحياتى لك

Beram ElMasry يقول...

استاذى الجليل . maxbeta3zaman
السلام عليكم ورحمة الله وبركاته
شكرا وارجو ان لاتنسى النثر ، وبالمناسبة مارايكم فى عمل مقدمة للقصائد

رئيس التحرير يقول...

الله ينور عليك..باين حلاوه الكلمه هترجع وتعود لنا البسمه ونسبح لله بجد ونركع
مش زي ابويا ما كان يزرع لجل ما الحق ينفع .

رئيس التحرير يقول...

ناوي تغير اسم المدونه ؟؟؟
الافضل ...بلاش..وان كنت مصمم حط النقطه..ويبقي كده %